Le 15–. English translation.
Ante que io creava le video in iste pagina, in le qual io recita un brevissime paragrapho in portugese e interlingua, io compliva varie experimentos con hardware e software, pro apprender obtener optime conditiones, que esserea anque applicabile pro videos musical que io intende un die producer.
Io non vole fatigar le lector con tote lo que io ha essayate, ma intende concentrar al resultatos final.
Caveat: io scribe partiente de Linux. Io ha permanentemente abandonate MS Windows in julio 2019.
Io utilisava le camera interne de mi laptop, un Acer One 14 Z2-485, e anque le microphono incorporate. Le resultatos con un microphono externe de bon mercato esseva minus bon. Le resultatos con le microphono interne pote variar per laptop. Il es sempre importante que le distantia inter le fonte sonor e le microphono non es tro grande. Circa 50–70 cm es optimal. Con nimie distantia le sono registrate sera cave, difficile a comprender si es linguage parlate, o con instrumentos e tonos musical que es difficile a distinguer con precision.
Io trovava le commando lsusb,
assi que io sape que le identification de mi camera es
“Chicony Electronics Co., Ltd Chicony USB2.0 Camera”.
Il ha anque le commando
v4l2-ctl -d /dev/video0 --list-formats-ext
e secundo le man page iste v4l2-ctl es
“An application to control video4linux drivers”. Vide anque le
sito web webcamtests.com.
De illos io sape que le camera in mi laptop ha 922 kilopixels, con un resolution maximal de 1280×720 pixels (HD, high definition). In comparation con apparatos photographic digital illo non es multo: Ja in maio 2001 io usava un Fujifilm FinePix1300 con 1,3 megapixels, e desde junio 2009 un Casio Exilim EX-Z85 con 9,1 megapixels. Multo plus que le 0,922 MP del webcam. Ma on debe considerar le numero de imagines per secunda, que require un grande capacitate del transmission de datos.
HD a 1280×720 non produce le videos multo nitide que a vices on vide in Youtube. Ma illo es plus tosto 4K UHD a 3840×2160. Tres vices plus pixels in ambe directiones, ergo novem vices plus datos.
Illumination es importante. Sin un bon illumination un video pote parer maculate, como si le resolution es multo basse.
Nimie poc lumine es un problema, ma nimie lumine anque non es bon. Importante es que le lumine, sia natural del sol, sia artificial de lampas, illumina le objectos a esser filmate, e non brilla a in le camera, que tunc va reducer le diaphragma, e facer toto troppo obscur.
Le incidentia de lumine es essential.
Primo io usava cheese (version 43.0). Un programma clar e
facile a usar.
Brevemente io provava kamoso de KDE, que semblava producer
videos plus nitide que cheese. Plus tarde gradualmente
iva placer me guvcview. Anque con videos apparentemente
plus nitide que illos de cheese, ma io non es certe si
illo non es un illusion.
Io non sapeva immediatemente como filmar con guvcview. Le
programma aperi duo fenestras, un con le actual imagines del camera
video, e un altere con varie “Settings”,
in interlingua: parametros. Ben que illo
es bastante logic e obvie, il non occurreva a me que le button
“Cap. Video (V)” esserea intendite pro illo. Forsan estranie
que io pensa assi, o forsan estranie que un tal button e function
se trova in un schermo de parametros. Il eveni sovente que le
io ha problemas con le intuitivitate de software. Si illo es
un falta in le software o un falta in mi maniera de pensar e
expectar, io non sape.
Le nomine guvcview non es facile a memorar, e veni de
GTK+ UVC Viewer, in le qual GTK sta pro GIMP ToolKit,
e UVC pro USB video class.
guvcviewIo testava con version 2.0.8. Le fenestra que appare primo es sub le scheda ([en]: tab) “Image Controls”, con glissatores pro parametros de imagines. In le menu Settings il ha Hardware Defaults (valores standard del hardware). Istes non me place. Troppo pallide e livide, poco expressive. Isto occurre super toto si sub le scheda Video Controls le Camera Output ha le valor “YUYV - YUYV 4:2:2”.
Pro compensar lo, mi alterationes esseva: Contrasto 32 deveni 44, Saturation 32 va a 50. Ma si le Camera Output es “MJPG - Motion JPEG” (que es melior, vide qui), illo es nimis, e le Saturation sia melio a 40 que a 50.
Interessantemente, le parametros non solo
es valide pro le programma guvcview mesme, ma anque pro
cheese e kamoso. Il pare que le parametros
non es immagazinate in un file de configuration de guvcview,
ma alicubi in le systema de operation, in le hardware, o in un driver.
Un test additional: si io glissa le controlator Hue completemente al derecte, anque Zoom e Verbling monstra me toto verde, como The Hulk. Ma sin le musculos, naturalmente.
Con le configuration usque nunc attingite, mi videos de prova habeva un problema grave: le sono non continuava, ma stoppava e recontinuava cata vice. (In nederlandese nos appella isto: haperen o horten, ma interlingua non pare haber parolas apte pro isto.)
Post satis multe tempore, per hasardo io trovava le causa e hinc le solution:
in guvcview, in le scheda Audio Controls, le parametro
Audio API esseva a PORTAUDIO. Ma io ha in mi systema Linux
PULSEAUDIO! Il appare que iste parametro requireva del processores
tanto travalio de conversion que un sono continue non era possibile.
Con PULSEAUDIO le problema era via.
Clipping vole dicer que le amplitude momentanee del sono excede le extension analoge o digital del hardware. Ergo le amplitude es bruscamente limitate a un plafond.
Il pote esser possibile postea reparar isto, ma prevenir es melior que remediar.
Specialmente in le sonos de instrumentos musical, e.g. un guitarra, il pote evenir piccos subite. Pro isto io trovava que in le Audio Mixer, Input Devices, un nivello del microphono de 22 o 20% es optimal. Isto corresponde (in comparation a 100%) a minus 39 a 41 dB.
Ma si le nivello es troppo basse, le risco de ruito cresce, naturalmente. Ergo cerca sempre mesme le optime compromisso pro vostre situation.
Le commando mentionate in alto,
v4l2-ctl --list-formats-ext
me informa que mi camera pote producer datos in iste duo formas
(io lassa via le resolutiones plus basse, que anque es possibile):
[0]: 'MJPG' (Motion-JPEG, compressed) Size: Discrete 1280x720 Interval: Discrete 0.033s (30.000 fps) [1]: 'YUYV' (YUYV 4:2:2) Size: Discrete 1280x720 Interval: Discrete 0.100s (10.000 fps)
Solo 10 fps, 10 frames per second? Proque tan poco? Illo non basta
pro video fluente! Io crede que le responsa a iste question es in
le transmission de data. Io non vermente comprende
YUYV, que sembla satis complicate. Ma io
assume que iste es le formato interne, the native format in
le qual le camera produce su imagines. Si nos de plus assume que
tres bytes es requirite pro codificar cata pixel, le data a transmitter
pro 10 frames per secunda es:
1280 x 720 × 3 × 10 = 921 600 × 3 × 10 = 27 648 000 bytes
Le numero de bits/s assi es:
27 648 000 × 8 = 221 184 000 = 221 Mb/s
Le capacitate maxime theoretic de USB 2.0, que es usate internemente pro le transmission del camera al processor central, es de 480 Mb/s, que clarifica proque 30 frames per secunda non es possibile.
Io conjice que le camera ha un proprie processor interne, que pote realisar le compression MJPG. MJPG considera cata imagine, cata frame del film separatemente pro le compression. Per consequentia, le compression non es multo bon, ma anque non require un grande capacitate del processor in le camera. E le resultato, nam minus datos a transmitter, suffice pro le transmission non de 10, sed de 30 frames per secunda.
Le compression de video que es hodie state of the art, es H264 (AVC). (No, H265 es ancora melior.) Illos non solo comprime le ‘photos’ in un video, ma anque cerca possibilitates de compression inter iste photos, o frames, imagines. Isto resulta in files multo plus parve, sed le algorithmos naturalmente anque require multe capacitate de processamento e memoria.
Il me sembla obvie que le MJPG livrate per le camera, debe primo esser decodificate retro a YUV, e depois de novo comprimite, ora a H264.
E durante mi experimentos, io notava que mi laptop non es bastante forte e rapide pro facer le registration e le compression immediatemente, in linea, in real time. Mi ‘Pentium Gold’, plus detaliate un Dual core Intel Pentium 4415U, del fin de 2017, con un processor graphic del typo Mesa Intel UHD Graphics; CometLake-U GT2, certemente ha bastante capacitate pro le labor normal quotidian. Ma pro labor intensive con video, in tempore real, illo es troppo lente. Al facer tornar le videos experimental, io videva un mal synchronisation inter sono e imagines. Causa: durante le registration, multe frames esseva saltate, per manco de fortia del nucleos processori.
Solution: in guvcview, in le menu Video, Video Codec, non
specifica “MPEG4-AVC (H264)”, sed “MJPG - compressed”, lo mesme que
esseva le Camera Output. Assi le programma debe solo
registrar le datos que illo recipe del camera, e non mesme comprimer.
Le compression alora pote evenir plus tarde, non in tempore real,
sed como tractamento per lotes (in anglese: batch processing),
per exemplo con
le programma kdenlive,
post le post-processamento.
Il non es un problema si 1 minuta de video require 3 minutas
de compression e codification. Il ha bastante tempore.
vlcLe cognite programma vlc pote esser usate pro sonar audio
e video. Le programma de registration de photos e videos
cheese offere un button pro vider le video(s) justo
create in vlc. Assi essayante varie cosas io discoperiva
que vlc (version: 3.0.21 Vetinari) offere effectos,
tractamentos, post-processamentos. E io decideva tunc usar los pro
mi videos.
Sed il habeva un problema: io non succedeva in salveguardar le video inclusive le effectos. Assi le effectos es solo effective temporarimente, que naturalmente es multo minus utile. O melio dicente: io trovava descriptiones de como salveguardar le mutationes in un nove file, ma le procedura era multo complicate, e al fin io videva un message de error, que era difficile a comprender. Ergo infelicemente, io desisteva del tentativa, e finalmente usava altere effectos de un altere programma.
Totevia io trovava le effectos interessante, e pro isto io los describe qui nonobstante.
Equalizer: reducer un poco le ruito, per diminuer le frequentias alte. Supra 6 kHz probabilemente a mi etate (69) io audi poco, ma personas plus juvene ancora si. Circum 170 Hz io ha reducite un poco le sono pro compensar un forte resonantia al chorda A, que habeva al minus le guitarra que io tunc usava. E circum 1 e 3 kHz un poco plus forte, pro un effecto ‘presence’ como a vices usate pro guitarras electric. Ma io usava un guitarra classic o espaniol.
Compression: isto reduce le volumine de passages alte, e amplifica passages basse. In altere parolas: de dynamica del musica es reducite. Le Make-up gain es importante: illo es melior si un poco plus basse, pro evitar distortion per clipping. Iste Make-up gain anque causa un typo de quantisation noise, ruito de quantisation, o al minus illo esseva le impression que io habeva.
Toto isto insimul creava un sono plus directe, como si le microphono starea plus proxime al fonte de sono que realmente stava. Naturalmente assi le sono non plus es natural, ma que illo importa, si isto es lo que me place?
Effectos de video de vlc que io usava:
Tools, Effects, Colors Gradient, e un
poco de Sepia. Isto me faceva irrecognoscibile, ma ben,
io non ha aeres de stella, al contrario. Le movimentos
del digitos del mano sinistre, monstrar del quales es un
objectivo de futur videos, remaneva ben visibile.
Anque Advanced, Motion Blur, isto pareva facer le movimentos del digitos ancora melio visibile. An illo es realmente ver?
Le 3 de julio 2024 io decideva nonobstante: io usara nulle
effectos de video, io lassa toto como es, ma con le
contrasto e saturation un poco adjustate, como
ja mentionate. Iste decision
io faceva non solo proque salveguardar del resultatos in
vlc ya non succedeva.
kdenliveVide in basso.
Le 8 de julio 2024: io habeva un video passabile del parte in portugese, e anque un del parte in interlingua, del video cuje prehistoria, e historia de facer, iste articulo essaya de describer. Io voleva deler un parte inutile del fin del prime parte, e combinar le secunde parte con le resultato. Collar duo videos le un al altere. Accopular los. Isto non deberea esser tan difficile, que pensa vos?
Io habeva vidite un video de demonstration de kdenlive in
Youtube, in le qual isto esseva le prime cosa que le demonstrator
faceva. Tamen, quando io lo essayava facer, quecunque io probava,
io non succedeva. Io trova kdenlive (version: 22.12.3)
un programma completemente contra-intuitive, il es incomprehensibile
como cosas es intendite a esser facite. Forsan iste problema reside
in me, e non in le programma. Tamen mi experientia con varie typos
de software ha comenciate in 1975 e ancora io travalia con programmas
cata die.
Qui io videva mention de shotcut.
Pretensemente multo plus facile. Io ha essayate lo, post haber mirate
partes de iste video de instruction, ligate de
qui.
De facto shotcut es plus facile e plus comprehensibile.
Io poteva tonder e collar. Il habeva un colpo acute al transition.
Solution: pulsa le comencio del secunde parte un poco super e trans
le fin del prime parte, e le programma automaticamente face un
transition fluide. Iste es intuitive! Un programma que tote
simplemente per se mesme face un cosa utile e obviemente desirate!
Multo ben.
Con kdenlive (si, iste vice io poteva facer lo) io ha addite
tres effectos de stereo, al clip cuje sono esseva originalmente
registrate con solo un microphono, nam le interne del laptop. Tote
le tres effectos (Haas, Extra, Widener) secun mi gusto es vermente
necesse, e in iste ordine. Comocunque, le stereophonisation del sono
monophone non es le plus importante. Ma como in le
essayo con vlc (con altere medios!)
le resultato es un effecto de proximitate, como si le microphono
starea plus presso le fonte de sono que illo de facto stava durante
le registration.
Passos concrete in kdenlive:
menu Project, Add clip or folder, selige le MP4
o altere file video. Quasi al sinistra in le medio del schermo,
preme Effects. Selige Stereo and Binaural Images.
Face duple clic al tres effectos in succession:
1) Haas Stereo Enhancer, (inspirate
per le
Effecto Haas, describite in 1949 per
Helmut Haas), 2) Extra Stereo, 3) Stereo Widener.
Pois: Project, Render, e selige le methodo de compression pro le nove file a salveguardar.